19. 6. 2020: Юрко ХАРИТУН: Квапкы поезії, Під стрїхов, Такый день, Любов уже така (Стишкы)

Юрко ХАРИТУН

 

КВАПКЫ ПОЕЗІЇ

Поезія іншпірація

яка поможе

і порадить

як до любові дорогу найти

Поезія

манна з неба

як фалатча доброго хлїба

Квапкы поезії

поможуть каждому

загасити жажду

 

ПІД СТРЇХОВ

Я сам на себе злый

коли не мож слова найти

якы бы пасовали до рядків

Розлетять ся як мотылї

Ховають ся як мышы у дїрї

А менї їх треба

як сіль до віршів

Вечур сиджу під стрїхов

чекам коли прилетить

звіздочка моя

Парадов буде у віршах

 

ТАКЫЙ ДЕНЬ

День за днём

і без крыл летить

Свистить

Крутить ся без колес

Бриньчіть

Кывать ся як колыска

Скрипить

Послухати хочу лем голос ёго

Такый день не добігну босый

Попрошу Пеґаса свого

 

ЛЮБОВ УЖЕ ТАКА

Із двох каменїв твердых

выскочіть іскра

Огень горить

Треба гасити водов

Нашы дві сердця не треба

коли горить любов

Любов

потїчків жрідла

стріберна ріка

погар вина

Выпити хочу до дна

 

(З приправлёваной книжкы Наш край – наш рай.)